නිවැරදි කාර් වොෂ් එකක් තෝරගන්නේ කොහොමද? How to select a car wash ?

ඔබට තියෙන්නේ කාර් එකක්ද? ජීප් එකක්ද? ඕෆ් රෝඩ් වාහනයක්ද? කන්වර්ටබල් එකක්ද? හැච්බැක් වාහනයක්ද? මේ මොන වාහනයක් තිබ්බත් ඒක හොඳම ‌තත්වයෙන් තියාගන්න එක තමයි ඔයාගේ වැදගත්ම රාජකාරිය. නිතරම සෝදන එකයි, යම් කාල පරාසයක් තුළ සර්විස් කරන එකයි කරොත් ඔයාගේ වාහනේ හොඳම කන්ඩිෂන් එකෙන් පවත්වගෙන යන්න පුළුවන් වෙනවා. 

වාහනේ නිතරම හෝදන එකෙන් මඟ තොටේදී වාහනය නිරාවරණය වෙන කුණු, දූවිලි, මඩ වගේ දේවල්වලින් වාහනයට වෙන්න පුළුවන් හානිය අවම වෙනවා. කාර් වොෂ් වලත් විවිධ වර්ග තියෙනවා. ඉතින් මේ මොන වර්ගය මොන කාලෙදිද හරියන්නේ කියලා දැනගෙන ඉන්න එක වාහනේ දීර්ඝකාලීන පැවැත්මට ලොකු රුකුලක්. 

1. හෑන්ඩ් කාර් වොෂ් සර්විස්

2. ස්ටීම් කාර් වොෂ් සර්විස්

3. ඔටෝ කාර් වොෂ් සර්විස්

මේ වර්ග වලට අමතරව තවත් කාර් ‌වොෂ්  ආකාර කිහිපයක්ම තිබුණත් මේවා තමයි වඩාත් සුලබවම දකින්න පුළුවන් ආකාර. ඉතින් අපි බලමු මේ සර්විස්වල හොඳ සහ නරක මොනවගේද කියලා. 

1. හෑන්ඩ් කාර් වොෂ් සර්විස්

මේක තමයි තෝරගන්න පුළුවන් හොඳම කාර් වොෂ් වර්ගය කියලා හඳුන්වන්න පුළුවන්. වාහනේ සෑම කොටසක් ගැනම අවධානය දක්වන, යන්ත්‍ර සූත්‍ර වලට වඩා මිනිස් අතින් කරන වැඩවලට කැමැත්තක් දක්වන අයට මේ කාර් වොෂ් වර්ගය ගැළපෙනවා. මේ ආකාරයේදී හොඳ තත්ත්වයේ සබන් සහ වතුර යොදාගෙන මිනිසුන් විසින් වාහනය සෝදනු ලබනවා. ඉන් අනතුරුව වාහනය වේළීම සහ වැක්‍යුම් කිරීම සිදු වෙනවා. 

වාසි 

• සීරීම් ඇතිවීමට ඇති ඉඩකඩ ඉතා අවමයි.

• තදින් ඇළුණු කුණු දූවිලි ඉවත් කරනු ඇත.      

අවාසි

• අවශ්‍ය බඩු බාහිරාදිය වැඩියි.

• අනෙකුත් ආකාරයන්ට සාපේක්ෂව වැඩි කාලයක් ගත වේ.

• වැඩි වතුර පරිභෝජනය සහ සාපේක්ෂව මිල අධික වේ.

• අවම ඉඩකඩකින් ඉටු කරගැනීම අපහසුයි.

• මිනිස් ශ්‍රමය අවශ්‍ය වේ

2. ස්ටීම් කාර් වොෂ් සර්විස්

හුමාලය මඟින් දැඩි උෂ්ණත්වය භාවිතා කරමින් වාහනයේ ඇති කුණු දූවිලි දිය කිරීම මෙහිදී සිදුවේ. අඩු වතුර පරිභෝජනය නිසා පරිසර හිතකාමී සර්විස් ක්‍රමයක් වන අතර රසායනික ද්‍රව්‍ය පාවිච්චියක් සිදු නොවේ. වාහනයට විය හැකි සීරීම් ගැන කිසිදු බියක් ඇති නොකරගත යුතු සහ අවම කාලයක් වැය වන ආකාරයකි.

වාසි

• අතින් සිදු කරන සර්විස් වලට සාපේක්ෂව අඩු වතුර පරිභෝජනයක් සිදුවේ. 

• වාහනයේ පිටතට මෙන්ම ඇතුළ පිරිසිඳු කිරීම සඳහාද යෝග්‍ය වේ.

• ආම්පන්න ‍රාශියක් අවශ්‍ය නොවේ.

අවාසි

• වියදම අධික විය ‌හැකිය.

• සුපරික්ෂාකාරීව සිදු නොකළහොත් එන්ජිමට හානි ඇතිවිය ‌හැකිය.

• සේදීමක් සිදු නොවන බැවින් කුඩා අහුමුළුවල ඇති කුණු දූවිලි ඉවත් නොවීමට ඉඩ ඇත.

3. ඔටෝ කාර් වොෂ් සර්විස්

අද කාලයේ දක්නට ලැබෙන නවීනතම වාහන සේදුම් ක්‍රමයයි. ඉතා කුඩා කාලයකින් පරිගණකගත යන්ත්‍රානුසාරයෙන් ඔබේ වාහනය සර්විස් කරගැනීමට ඔබ බලාපොරොත්තු වේ නම් මෙය ඔබට ඇති හොඳම කාර් වොෂ් ක්‍රමයයි. වාහනය සේදීම සහ වේළීම සිදුවන යන්ත්‍ර පද්ධතියක් තුළින් මෙහිදී වාහනය ගමන් කෙරේ. 

වාසි 

• සාපේක්ෂව මිල අඩුයි.

• ඉතා ඉක්මනින් සේවාව ලබාගත හැකිය

අවාසි

• භාවිතා කරන රසායනික ද්‍රව්‍ය නිසා වාහනයට හානි සිදුවිය හැකිය.

• තදින් ඇළුණු කුණු දූවිලි ඉවත් කිරීම සඳහා යෝග්‍ය නොවේ.

• වාහනය සීරීමට ඉඩකඩ ඇත.

වාහනයට වෙන්න පුළුවන් හානිය අවම කරගෙන හොඳට සුපරික්ෂාකාරීව සර්විස් කරගන්න ඕනේ නම් හොඳම විදිය තමයි හෑන්ඩ් කාර් ‌වොෂ් සර්විස් එකකට යන එක. සර්විස් කරන්න යන සර්විස් සෙන්ටර් එකක් තෝරගන්නකොටත් ටිකක් සැළකිලිමත් වෙන්න ඕනේ. පළපුරුදු වෘත්තීමය සේවකයින්, මිල සහ වාහන නඩත්තුව වගේ කරුණු කිහිපයක්ම මෙතනදී සලකා බලන්න ඕනේ.

• සුදුසුකම්ලත් වාහන සේදුම් විශේෂඥතාවය

හොඳ පුහුණුවක් ලත් සේවක මණ්ඩලයක් සිටින ප්‍රදේශයේ වාහන සර්විස් කිරීම සම්බන්ධයෙන් විශේෂඥතාවය සහිත සර්විස් සෙන්ටර් එක තෝරගන්න.

• වෘත්තීමය නිපුණත්වය

වාහන නඩත්තුව සහ සර්විස් කිරීම ගැන පුළුල් වෘත්තීමය නිපුණත්වය ගැන හොඳින් සැළකිලිමත් වෙන්න. දක්ෂ කාර්ය මණ්ඩලයක්, ඉතා හොඳ පාරිභෝගික සේවාවක් සහ සර්විස් එකෙන් සෑම පිරිසිඳු කිරීමක්ම ඉටු කරන ආයතනයක් තෝරාගන්න වග බලාගන්න.

• විනිවිදභාවයෙන් යුත් සේවාව

හොඳ සහ පැහැදිලි සන්නිවේදන හැකියාවක් තිබීම තවත් අත්‍යවශ්‍ය දෙයක්. අය කරන මිල පිළිබඳ පැහැදිලි, විනිවිද ක්‍රියාපටිපාටියක් තිබීම අනිවාර්යය කරුණක්. සේවාව ලබාදීමට කලින් මිල පිළිබඳ දැනුවත් කිරීම හොඳ සේවාවක් ලබාදෙන ආයතනයක දකින්න ලැබෙන ගුණාංගය‌කි.

• බෝනස් පොයින්ට් එකක්

කාර් වොෂ් එකකට යනවනන් ඒකට පාවිච්චි කරන වතුර recycle කරනවද නැත්තන් මුහුදු වතුර හරි අපිරිසුදු වතුරද කියන එක ටිකක් හොයල බලන්න මොකද නැත්තම් වාහනේ පේන්ට් එකටයි පාට්ස් වලටයි ඩැමේජ් වෙන්න පුලුවන්. 

කාලය, බජට් එක සහ වාහනයේ අවශ්‍යතාවය වගේ කරුණු සියල්ල සලකා බලා වාහනය සර්විස් කරන්න. සර්විස් එකට කලින් සහ පසුව වාහනය හොඳට පරීක්ෂා කර බලන්න. භාවිතය සහ නියමිත කාල පරාසයට අනුව හරියට වාහනය සර්විස් කරන එකෙන් වාහනයේ පෙනුම පවත්වාගෙන යන්න  වගේම ආයුකාලයත් වැඩි කරගන්න පුළුවන්.මිට අමතරව ඉදිරි ලිපි වලින් වාහනය වොෂ් කිරීම සහ ඒ සම්බන්ධ ටිප්ස් ගෙන එන්න බලාපොරොත්තු වෙනවා.රැඳි ඉන්න careka.lk අපිත් එක්ක.

මේවගේ තවත් Article කියවන්න පිවිසෙන්න - careka.lk Blog Home