දුර ගමනක් යන්න කලින් වාහනයේ චෙක් කළ යුතු දේවල් - How to check your vehicle before a long trip

අද කාලේ ට්‍රිප් එකක් යන එක කොච්චර අමාරු දෙයක්ද කියලා ඔයා දන්නවනේ. ලොකුම ප්‍රශ්නෙ තමයි වෙලාව හොයාගන්න එක. ඉතින් එහෙම අමාරුවෙන් ප්ලෑන් කරපු ට්‍රිප් එකක් යද්දි වාහනේ කැඩුණොත් එහෙම? කැඩෙන්නෙත් උදව්වට කාත් කවුරුත්ම නැති පිටිසර පළාතක නම්? 

ඉතින් මේ වගේ අත්දැකීමක් ඔයාට අත්විඳින්න වෙන ඉඩකඩ අඩු කරගන්න උදව් වෙන උපදෙස් කිහිපයක් අරන් එන්න අපි හිතුවා. ගමන යන්න කලින් මෙන්න මේ දේවල් ගැන හොඳට සැළකිලිමත් උනොත් ප්ලෑන් කරපු විදියටම කිසිම කරදරයක් නැතුව ගමන ගිහින් එන්න පුලුවන්.

1. පිරිසිඳු වාහනයකින් වැඩේ පටන් ගමු.

ගමනක් යන අතරමඟදී වාහනය අපිරිසිඳු වෙන එක වෙනම දෙයක්. ඒකත් එක අතක විනෝදයක්. හැබැයි ගමන පටන් ගන්න කලින්ම වාහනය අපිරිසිඳුයි නම් ප්‍රශ්නයක්. වාහනය හොඳට හෝදල පිහදලා අවශ්‍ය නම් පොලිෂ් ටිකකුත් ගාලා වැඩේ පටන් ගමු. වාහනය ඇතුළත් හොඳට පිරිසිඳු කරන්න. එහෙ මෙහෙ ගෙනියන්න පුලුවන් විදියේ පොඩි කසළ භාජනයක් හරි බෑග් එකක් හරි වාහනය ඇතුළෙන් තියන්න. සීට් වලයි බිමයි පොඩි කෑම කෑලි, බීම බෝතල්, ටොපි කොළ තියෙන එක ප්‍රසන්න දෙයක් නෙමෙයි.

2. ඕනම දේවල් ආරක්ෂාකාරි විදියට පැක් කරගමු.

මේක දවස් දෙක තුනක ගමනක් වෙන්න පුලුවන් නිසා උවමනා ඇඳුම් පැළඳුම් ගෙනියන්න වෙන්වා. ගානට ඩිකියට දාගන්න පුලුවන් විදියේ මලු කිහිපයක් නම් තියෙන්නේ කිසිම ප්‍රශ්නයක් නැහැ. හැබැයි වාහනේ හුඩ් රැක් එකේ ගමන් මලු දාගෙන යනවනන් ප්ලාස්ටික් රෙද්දකින් මලු ටික වහන්න ඒවගේම හුඩ් රැක් එකක් නැත්නම් වාහනේ හුඩ් එක උඩින් ටෙන්ට් රෙද්දක් හරි ප්ලස්ටික් රෙද්ද්ක් තියල මලු ටිකත් ඒකෙන්ම වහන්න මොකද හුඩ් එකේ පේන්ට් එක නැත්නම් ඩැමේජ් වෙන්න පුලුවන් නිසා. ඒවගේම කාලගුණ තත්ත්ව වලින් බඩු මුට්ටු ආරක්ෂා වෙනවා වගේම වාහනය සුමටව ධාවනය වෙන්නත් මේක උදව් වෙනවා. වායුගතිකව (Aerodynamic) වාහනය ස්ථාවරව තියෙන්න නම් බඩු මුට්ටු සහ වාතය අතර ඇති වෙන ඝර්ෂණය අවම වෙන්න ඕනේ.

3. එන්ජින් එකට මූලික අවධානය දීලා ෆුල් චෙකප් එකක් දාගන්න.

වාහනයේ එන්ජින් එකට මොනවහරි උනොත් හදලා දෙන්න කෙනෙක් ඒ වෙලාවට ඉඳියි කියලා අපිට බලාපොරොත්තු වෙන්න බැහැ. ඒක නිසා ගමනට කලින්ම ඔයා දන්න අඳුරන මැකෑනික් කෙනෙක්ව හම්බෙලා එන්ජින් එක චෙක් කරගෙන සර්විස් එකකුත් කරගන්න. එයාර් ෆිල්ටර්ස් චෙක් කරලා අවශ්‍ය නම් මාරු කරගන්න. ඒ වගේමයි එන්ජින් එකේ සද්දෙ වෙනසක් තියෙනවද කියලා විමසිලිමත් වෙන්න.

ඊට අමතරව ටයර් වල එයා ප්‍රේශර්(Air Pressure) එක ,ටයර් වල තත්වය, අනුමත ප්‍රමාණයට තියනවද කියල චෙක් කරන්න.ගමන මැදදී ඔබේ ටයර් එකට හානි වෙලා ටයර් කඩ සොයන්න වෙන නිසා අනිවාර්යෙන්ම එ දේ කරන්න.නමුත් අලුත් ටයර් එකක් උනත් දුරගමනකදී හානියක් උනොත් අපහසුවකින් තොරව ගමන යන්න ස්පෙයාර් වීල් එකක් මතක ඇතුව වාහනේ තියාගන්න.මීට අමතරව ස්ටියරින් වීල් එක බ්‍රේක්,කල්ච් එක වගේම එ/සී එකත් හරියට වැඩකරනවද කියලා චෙක් කරන්න.

4. බැටරිය හොඳයිද කියල කලින්ම දැනගමු.

ගමන අතරතුර අව්ව වැස්ස, සීතල කාළගුණය මේ හැමදේම තියෙන්න පුලුවන්. මේ දේවල් වලට බැටරිය ඔරොත්තු දෙනවද කියලා කලින්ම දැනගෙන ඉමු. බැටරියේ වතුර චෙක් කරන්න. සාමාන්‍යයෙන් බැටරිය කියන්නේ නිතර නඩත්තුවක් සිද්ධ වෙන්නේ නැති දෙයක් ඒකයි අපිට බැටරිය චෙක් කරන්න අමතක වෙන්නේ. කෝකටත් කියලා හදිසි අවස්ථාවක වාහනය ස්ටාර්ට් කරගන්න පුලුවන් විදියර බැටරි ජම්පර් කේබල්(Jumper cable) එකක් අරගෙන යන්න.

බැටරිය ගැන වැඩි විස්තර දැනගන්න කැමති නම් මීට පෙර අපි බැටරිය ගැන පලකරපු සවිස්තරාත්මක ලිපිය බලන්න අපේ බ්ලෝග් එකට යන්න - https://www.careka.lk/news/category

5. ලයිට්, විද්‍යුත් උපාංග සහ කුඩා දේවල්

සාමාන්‍යයෙන් ප්‍රශ්නයක් ඇති වෙනකන්ම අපිට වයිපර්, ලයිට්, හෝන් එක වගේ දේවල් මතක් වෙන්නේ නැහැ. හැබැයි අපි හිතන්නෙවත් නැති විදියේ ලොකු ප්‍රශ්න ඇති කරන්න මේ පොඩි පොඩි දේවල් වලට පුලුවන්. ඒක නිසා මේවත් චෙක් කරලා බලමු. අමතර ලයිට් තියෙනවා නම් ඒවත් අරගෙන යන්න අමතක කරන්න එපා. වයිපර් වල තියෙන පොඩි වැරැද්දක්වත් නොසලකා හරින්න එපා. මොකද තද වැස්සකට ඔයාගේ ගමන නැති කරන්න දෙන්න බැහැනේ. 

6. ඉමර්ජන්සි කිට්

ඉමර්ජන්සි කිට් එකක් වාහනයට අත්‍යවශ්‍යයි කියලා ගොඩක් අය දැනගෙන හිටියට මේකේ අනිවාර්යයෙන්ම තියෙන්න ඕනේ මොනාද කියලා සමහර අය දන්නේ නැහැ. යුනිවර්සල් ඉස්කුරුප්පු නියනක්, ෆ්ලෑෂ් ලයිට් එකක්/ ටෝර්ච් එකක් සහ අමතර බැටරි අනිවාර්යයෙන්ම තිබිය යුතුයි. ඊට අමතරව ටයර් එකක් මාරු කරගන්න උවමනා ආම්පන්න තියෙන එකත් අනිවාර්යයි. ජම්පර් කේබල් සහ ඇදගෙන යාමට උදව් වෙන පටි හෙවත් ටෝවින් කේබල්ස් හදිසි අවස්ථාවකට ගොඩක් ප්‍රයෝජනවත් වෙනවා. 

7. විනෝදාස්වාදයට අවශ්‍ය දේවල් අමතක කරන්න එපා!

දැන් ගමන යන්න වාහනය සූදානම්. හොඳ සිංදු තියෙන ප්ලේලිස්ට් එකක් අරගෙන යන්නත් අමතක කරන්න එපා. මොකද දුර ගමන් වෙහෙසකරයි. ඒවගේම සින්දු කියන්න ගිටාර් එකක් බොන්ගො එකක් වගේ අරන් යන්න නැත්තන් වාහනේට තට්ටු කරල ඩැමේජ් වෙන එකයි වෙන්නේ. එකම විහිලුවට එක දිගට හිනා වෙන එක, හැමෝම දන්න සිංදුවක් කෑගහලා කියන එක වගේ දේවල් ඔයාට අමතක නොවෙන මතකයන් ඉතුරු කරයි. සමහරවිට ට්‍රිප් එකේ හොඳම මතකයන් බවට මේවා පත්වෙයි. කාර්ඩ් පැක් එකක් පොඩි බෝඩ් ගේම් එකක් අරන් යන්නත් අමතක කරන්න එපා. 

ගමනට කලින් ලෑස්ති වෙද්දි වැඩ වැඩියි තමයි, ඒත් හරියට සූදානම් වෙලා ගියොත් ගමනෙදි මුහුණ දෙන්න වෙන ප්‍රශ්න ගාන අඩුයි වගේම ඕනම අවස්ථාවකට ගැලපෙන දේවල් ඔයා ගාව තියෙන නිසා කිසිම බයක් නැතුව සතුටින් ගමන ගිහින් එන්න පුලුවන්. 

8. කඳු පලාත් වලදි විමසිලිමත් වෙන්න

නුවරඑලිය,බදුල්ල,බණ්ඩාරවෙල වගේ වැඩිපුර  කඳු පල්ලම් තියෙන පළාත් වල යනවා නම් කොළඹ පාරවල් වල යනවා වගේ හැටට හැටේ යන්න බලාපොරොත්තු වෙන්න එපා.ඒ වගේම මේ පළාත් වල බ්‍රේක් කරද්දී එන්ජින් එකෙන්ම ස්ලෝ කරන්න බලන්න.ඒ කිව්වේ වාහනේ අඩු ජියර් එක්කට මාරු කරලා වාහනේ වේගය අඩු කරගන්න බලන්න.එහෙම නොකර බෑවුම් වැඩි තැනකදී බ්‍රේක් කලොත් ඔබේ බ්‍රේක් සිස්ටම් එකට ඒක දරාගන්න බැරි මට්ටමකට ඇවිල්ලා බ්‍රේක් පෑඩ් රත්වීම නිසා බ්‍රේක් බයින්ඩ් තත්ත්වයක් ඇතිවෙන්න පුලුවන්.හදිස්සියෙවත් එහෙම උනොත් වාහනේ ටික වෙලාවක් නවත්තලා තියල බ්‍රේක් කූල් කරගන්න පූලුවන්. 

9. නිදිමත් ආපු වෙලාවට

නිදිමත ආපු වෙලාවක් නම් අනිවාර්යෙන්ම නොකලයුතුම දෙයක් තමයි ඩ්‍රයිව් කරන එක.නමුත් ඔබ දුරගමනක් යනකොට එකදිගට රියපදවන නිසා නිදිමත ඇතිවෙන එක අලුත් දෙයක් නෙමෙයි.මේකට එකම විසඳුම “පවර් නැප්“ එකක් එහෙමත් නැත්තම් වාහනේ ආරක්ශිතව පාරේ අයිනේ නවත්වලා විනාඩි 15ක විතර ඉතා කෙටි නින්දක් ලබාගන්න එක.මීට අමතරව අවම වශයෙන් පැය 2 - 3 කට වරක් වත් ඩ්‍රයිව් කරන එක නවත්වලා පොඩි රෙස්ට් එකක් ගන්න.එකෙන් ඔබට ඇතිවෙන තෙහෙට්ටුව අඩු කරගන්න පුලුවන් වගේම නිදිමත අඩු කරගන්නත් පුලුවන්.

10. මාර්ග නීති

ඊලඟ වැදගත්ම දේ මාර්ග නීතී ගැන සැලකිලිමත් වීම.හිතන්න ඔබ කොලඹ ඉඳන් යාපනයට යනවා කියලා එක් දවසක ගමනකට.එහිදි ගමන අවසානයේදී යාපනයෙදී මාර්ග නීතියක් කඩලා පොලීසියෙන් උසාවි යන තරමේ දඩකොලයක් ලැබුනා කියලා.ඉතින් දඩයක් ගෙවන්න විතරක් යලිත් කොළඹ ඉඳන් යාපනේ යන්න වෙනවා කියලා මතක් වෙනකොට ඔබම හිතන්න මේ ක්‍රියාවලියේ අපහසුකම්.ඒ නිසා දුරගමන් වලදී වෙනදාට වඩා මාර්ග නීතී ගැන අනිවාර්යෙන්ම අවධානයක් ලබාදෙන්න.

11. ගූගල් මැප්

අනෙක් ටිප් එක ගූගල් මැප් වලට අදාලයි.දැන් දැන් ගොඩක් දෙනා ගූගල් මැප්ස් වලින් යන එන පාරවල් සොයාගන්නවා.හැබයි දුරගමනකදීත් ගූගල් මැප්ස් භාවිතා කරනවා නම් අනිවාර්යෙන්ම ඔබ දුරකථන සංඥා අඩු,අවම පළාත් වලදී පාර හොයාගන්න නොහැකි වෙලා අපහසුතාවයකට පත්වෙන්න පුලුවන්.මේක මඟහරවා ගන්න ඔබට ක්‍රියාමාර්ග තුනක් අනුගමනය කරන්න පුලුවන්.පලවෙනි එක ගූග්ල් මැප්ස් වල ඔෆ්ලයින් විදියට මැප් ඩවුන්ලෝඩ් කරගැනිමේ පහසුකම භාවිතා කරලා ඔබ යන පළාතේ මැප් එක කලින්ම ඩවුන්ලෝඩ් කරගන්න එක.(නමුත් මේ ක්‍රමේදී ඔබ ඉන්න තැන යන තැන ආදිය එවෙලේම පෙන්වන්නේ නැහැ) අනෙක ගමන යන්න කලින් පාරවල් ගැන දැනුවත් වෙලා යන එක.අවසාන එක මාර්ගය ගැන අවබෝධයක් නැත්නම් අතරමගදී හමුවෙන ප්‍රදේශවාසියෙක්ගෙන් හෝ ත්‍රීරෝද රථ රියදුරෙක්ගෙන් මාර්ග තොරතුරු දැනගන්න එක.

12. ඔබේ හැසිරීම ගැන සැලකිල්ලෙන් !

මේ ලිපියේ අවසාන හා ඉතාමත් වැදගත්ම ටිප් එක තමයි, මේ දුරගමනක් එකදිගට යන නිසා ඔබට වෙනදට වඩා වැඩි තෙහෙට්ටුවක්,විඩාවක්,මහන්සියක් දැනෙන එක සාමාන්‍ය දෙයක්.නමුත් මේ වගේ අවස්ථාවක මාර්ගයේ යනෙන වෙනත් වාහන වල සුලු වැරැද්දකදී ඔබට වැඩි කෝපයක් හටගන්න පුලුවන්.මේ නිසා ඔබ අතින් අනෙක් වාහන වලටත් අනෙක් වාහන වලින් ඔබටත් අනතුරු අවම වෙන විදියට දුරගමනකදී සෑම විටම ගමන් කරන්න බලන්න.සෑම විටම කෝපය පාලනය කරගෙන ඉක්මන් තීරණ නොගෙන සිතා බලා තීරණ ගන්න බලන්න.එය ඔබෙත් මාර්ගය භාවිතා කරන සැමදෙනාගේත් ජීවිත හා දේපල ආරක්ෂා කරනවා නිසැකයි.

මේවගේ තවත් Article කියවන්න පිවිසෙන්න - careka.lk Blog Home